El Real Uviéu suma una nueva victoria nesta temporada. El pasáu domingu l'equipu de la capital enfrentóse en casa contra l'Astur nún partíu que nun tuvo mayor misterio pal conxuntu azul.

El primer gol llegó yá nel minutu 2 (Mario Prieto), lo que faía suponer que les coses nun diben acabar bien pal equipu visitante. Pocu dempués, nel minutu 5, llegaba'l segundu (Invernón).  Yá na segunda metá cairían-ys  otros cuatro: Jorge Rodríguez (48'), Villanueva (51') y Cervero (76', 78').

L'entrenador visitante dixo díes enantes del encuentru que esti añu nun encajaríen siete goles comu l'añu anterior, anque pudieron ser munchos más si nun fuera pola buena actuación del porteru del Astur.

Con esti resultáu l'Uviéu colócase primeru na tabla y vuelve ilusionanos a toos una vegada más. Esperemos que esti añu seya'l definitivu.

Una vegada más l'asturianu Fernando Alonso fixo lo imposible, quedó primeru por segunda vegada consecutiva nesti añu. Pesie a que yá nun pue optar a ser campeón del mundiu nesta temporada, l'ovetense nos fae mantener la esperanza pa un futuru.

Esta vegada la victoria supo-y tovía meyor que la anterior, ya que foi totalmente por méritos propios, nin safety car nin ná se-y pué reclamar al pilotu. Amás, el so compañeru, Nelson Piquet, algamó la cuarta posición, polo que cabe suponer que dalgo tá camudando na escuderia francesa.

Renault paez querer que l'asturianu siga con ellos na próxima temporada pero habrá que esperar ta payares pa conocer el futuru del pilotu.

Ayeri, sábadu 20 de setiembre, el Real Uviéu sumó una nueva victoria ante'l Cuadonga. L'encuentro tuvo llugar a les 18 hores nel J.A. Rabanal.

Na primera metá, Jorge Rodríguez adelantaba'l marcador para los azules. Dempués sucediéronse delles ocasiones para los locales pero ensin dengún éxito.

Yá na segunda metá, anúlan-y dos goles al Uviéu, pero l'equipu de la capital nun se rinde. Nel minutu 76 Nacho Méndez remata de cabeza y marca'l segundu. Más tarde, Cervero marca'l terceru y sentenciaría asina'l partíu.

Pesie a que'l Uviéu ganó ayeri por goleada, los de Raúl González sufrieron tola primera metá, ya que nel minutu 16 s'adelentó'l Sieru y l'equipu de la capital nun marcó dengún gol nesta parte.

El primer gol del conxuntu ovetense llegaría namás entamar la segunda metá, un gol de penalti de Cervero, quien consiguió un hattrick nesti encuentru. El Sieru comenzó a venise abaxo, cosa qu'aprovecharon los oviedistes pa marcar el 4-1, el tercer gol a cargo de Jorge Rodríguez.

Tres la xornada d'ayeri, el Real Uviéu va 6º dempués de ganar dos partíos y perder ún, mientres que'l Universidá d'Uviéu sigue liderando la tabla.

Fernando Alonso consiguió güei un cuartu puestu nel Gran Premiu de Monza, dempués de salir octavu, gracies a la bona decisión de camudar los neumáticos de lluvia polos intermedios. Dempués de que l'asturianu fixera la so parada y viendo comu meyoraba los sos tiempos, el restu de la parrilla opto pola mesma estratexa.

Foi una carrera peculiar que entamó col safety car na pista, pero estu nun supunxo dengún problema pal alemán Sebastian Vettel, quien tres la victoria de güei se convierte nel ganador más xoven de l'hestoria en ganar un gran premiu, con sólo 21 años.

La clasificación foi:
1º Vettel
2º Kovalainen
3º Kubica
4º Alonso
5º Heidfeld
6º Massa
7º Hamilton
8º Webber

Polo que Lewis Hamilton sigue liderando'l mundial, anque a tan solo un puntu tien a Felipe Massa.

Ayeri tuvo llugar el segundu encuentru lligueru del recién ascendío Sporting de Xixón. El partíu celobróse nel Sánchez Pizjuan a les 22 hores.

L'equipu asturianu entamó ganando 0-2, dambos goles de Billic, pero pronto comenzaría a remontar el Sevilla. La primera parte acabó con un empate a 3, con hattrick de Billic, y más tarde, yá na segunda metá, Kanouté marcaría'l gol que-ys daría la victoria a los de Manolo Jimenez.

A pesar del bon partíu que fixo ayeri l'equipu de Preciado, cuenten con una nueva derrota nesta temporada. Poro, el técnicu sportinguista asegura que "hai munchu que correxir".

Esperemos que l'únicu equipu asturianu que tá en primera agora mesmu tenga más suerte nes próximes xornaes, anque lu tendrá difícil ya que los próximos encuentros sedrán contra'l F.C. Barcelona y el Real Madrid.