Fernando Alonso consiguió güei un cuartu puestu nel Gran Premiu de Monza, dempués de salir octavu, gracies a la bona decisión de camudar los neumáticos de lluvia polos intermedios. Dempués de que l'asturianu fixera la so parada y viendo comu meyoraba los sos tiempos, el restu de la parrilla opto pola mesma estratexa.

Foi una carrera peculiar que entamó col safety car na pista, pero estu nun supunxo dengún problema pal alemán Sebastian Vettel, quien tres la victoria de güei se convierte nel ganador más xoven de l'hestoria en ganar un gran premiu, con sólo 21 años.

La clasificación foi:
1º Vettel
2º Kovalainen
3º Kubica
4º Alonso
5º Heidfeld
6º Massa
7º Hamilton
8º Webber

Polo que Lewis Hamilton sigue liderando'l mundial, anque a tan solo un puntu tien a Felipe Massa.

Ayeri tuvo llugar el segundu encuentru lligueru del recién ascendío Sporting de Xixón. El partíu celobróse nel Sánchez Pizjuan a les 22 hores.

L'equipu asturianu entamó ganando 0-2, dambos goles de Billic, pero pronto comenzaría a remontar el Sevilla. La primera parte acabó con un empate a 3, con hattrick de Billic, y más tarde, yá na segunda metá, Kanouté marcaría'l gol que-ys daría la victoria a los de Manolo Jimenez.

A pesar del bon partíu que fixo ayeri l'equipu de Preciado, cuenten con una nueva derrota nesta temporada. Poro, el técnicu sportinguista asegura que "hai munchu que correxir".

Esperemos que l'únicu equipu asturianu que tá en primera agora mesmu tenga más suerte nes próximes xornaes, anque lu tendrá difícil ya que los próximos encuentros sedrán contra'l F.C. Barcelona y el Real Madrid.

El Conceyu Abiertu pola Oficialidá (CAO) convoca una vegada más una movilización pola Oficialidá del asturianu. El lema d'esta nueva campaña ye "Ensin Oficialidá nun hai Estatutu que valga". Esta manifestación saldrá de la Estación del Norte d'Uviéu (cai Uría) a les 18 hores del sábadu, 4 d'ochobre de 2008.

El patrimoniu llingüístico ye cosa de toos y poro anímovos a toos a participar nesti eventu. Llegó'l momentu de lluchar polos nuesos drechos.

¡Na reforma l'Estatutu, l'asturianu llingua oficial!

Güei entamo el mio primer blog. Sedrá un blog sobre Asturies y escrito na llingua d'Asturies. Animeme a ello porque ye una manera de sentime lligada a la mio tierrina, ya que dende yá hai años toi estudiando fuera d'ella, y tamién col oxetivu de que tolos que, comu yo, tán fuera tean tamién en contautu col nueso Paraísu.

Espero que vos preste.